Annertussusileriikkanik ikiorsiissutit pillugit Inatsisartut peqqussutaat nr. 15, 12. november 2001-imeersoq.
Suliassaqartitsiniarnermik inunnillu isumaginninnermik Kalaallit-Nunaannut inatsit nr. 580, 29. november 1978-imeersoq naapertorlugu makkua aalajangersarneqarput:
Nalinginnaasumik patsisissaatinneqartut
§ 1. Annertussusileriikkanik ikiorsiissuteqartoqartassaaq sulinermik inuussutissarsiuteqartunut suliffissaaleqinermik napparsimanermilluunniit pissuteqartumik isertitassanut annaasanut taartitut.
Imm. 2. Sulinermik inuussutissarsiutilittut naatsorsuunneqarput inuit isumaqatigiissutit imaluunniit isumaqatigiissuteqarsimaneq naapertorlugu sulisitsisumi atorfeqartut taassumalu ilitsersuutaanik malinnittussaatitaasut.§ 2. Kommunalbestyrelsi sulinermik inuussutissarsiuteqartunut annertussusileriikkanik ikiorsiissuteqassaaq,
1) pineqartoq 18-inik ukioqalereersimappat pilersuisuuppalluunniit, aamma
2) pineqartoq Kalaallit Nunaanni aalajangersimasumik najugaqarpat tassanilu inuit aqqisa allattorsimaffianni nalunaarsorsimappat.
Imm. 2. Imm. 1 naapertorlugu annertussusileriikkanik ikiorsertittoqarsinnaalertassaaq pineqar-toq sapaatip akunnerini 13-ini kingullerni sulinermik inuussutissarsiuteqartutut sulisimappat piffissamilu tassani minnerpaamik nalunaaquttap akunnerini 180-ini sulisimappat.§ 3. Inuit pisortanit pensionisiallit, piginnaangorsaaqqinnermi ikiorsiissutisisartut, ilinniaga-qarnersiutillit imaluunniit pinerluuteqarsimasunik isumaginnittoqarfiup inissiisarfiutaani isumaginninnikkulluunniit ingerlatsiviit paaqqinnittarfiutaanni inissinneqarsimasut annertussusileriikkanik ikiorsiissutisisinnaatitaanngillat.
Suliffissaarunnermi annertussusileriikkanik ikiorsiissutit
§ 4. Ullormit suliffissaaruffimmit siullermit annertussusileriikkanik ikiorsiisoqartassaaq.
Imm. 2. § 8 malillugu ikiorsiissutit naatsorsorneqartassapput qaammatillu malittuinnaat 12-it ingerlaneranni katillugit sapaatip akunnerini 13-ini ikiorsiisoqarsinnaalluni.
Imm. 3. Ikiorsiinissamut makkua piumasaqaataapput:
1) pineqartup uppernarsarsinnaassavaa peqqissutsikkut allatigulluunniit atugarisaminut naapertuuttumik suliffissamik innersuussisoqarsinnaanngitsoq, aamma
2) suliffissaarunneq nammineq pisuussutaanngitsoq imaluunniit feriarnermik, suliumajunnaarnermik sulisitsisulluunniit mattussineranik pissuteqanngitsoq.
Imm. 4. Inuup suliffissaq innersuunneqartoq suliffigiumanngippagu kommunalbestyrelsip annertussusileriikkanik ikiorsiisarneq unitsissavaa.
Imm. 5. Annertussusileriikkanik ikiorsiissutinik qinnuteqartut suliffeqalernissamut piareersi-manissamut pisussaaffii il. il. pillugit Naalakkersuisut erseqqinnerusunik malittarisassaliorsinnaapput.
Napparsimanermi annertussusileriikkanik ikiorsiissutit
§ 5. Napparsimalernermit ullut pingajussaannit napparsimanermi annertussusilerikkanik ikiorsiisoqartassaaq.
Imm. 2. § 8 malillugu ikiorsiissutit naatsorsorneqartassapput qaammatillu malittuinnaat 12-it ingerlaneranni katillugit sapaatip akunnerini 13-ini ikiorsiisoqarsinnaalluni.
Imm. 3. Sapaatip akunneri marluk sinnerlugit napparsimasoqartillugu imaluunniit sulilluni ajoqusernikkut napparsimalersoqartillugu ulloq napparsimalerfik aallarnerfigalugu ikiorsiisoqartassaaq.§ 6. Sapaatip akunneri pingasut sinnerlugit napparsimanermi imaluunniit sivikitsukkuutaanik napparsimaqattaartoqarnerani pissutsit pineqartumut tunngasut kommunalbestyrelsip isummerfiginiassavai naliliiffigalugu allatut ikiorseeriarnissaq neqeroorutigineqartariaqarnersoq.
§ 7. Ikiorserneqarnissamik qinnuteqartumit nakorsap uppernarsaatitut allagartaliussaa kommunalbestyrelsip piumasarisinnaavaa. Taamaattoqartillugu nakorsap uppernarsaatitut allagartaliussaanut aningaasartuutit kommunip akilissavai.
Ikiorsiissutit annertussusii tunniunneqartarnerilu
§ 8. Annertussusileriikkanik ikiorsiissutit tunniunneqartassapput nalunaaquttap akunneranut aalajangersimasumik annertussusilerlugit, taannalu annertussuseqassalluni SIK-p Naalakkersuisullu isumaqatigiissutaat malillugu suliamik ilinniagaqarsimanngitsumut akissarsiat minnerpaat 55 %-attut.
Imm. 2. Ikiorsiissutit naatsorsorneqartassapput sulinermik inuussutissarsiuteqartup sapaatip akunnerini kingullerni 13-ini nalunaaquttap akunneri suliffigisimasai tunngavigalugit, sapaatip akunnikkuutaartumik kingumoortumik tunniunneqartassallutik, annerpaamillu sapaatip akunneranut nalunaaquttap akunneri 40-t naatsorsuunneqartassapput.
Imm. 3. Sapaatip akunneri arlallit ataannartumik suliffissaarusimasoqartillugu sapaatip akunnikkuutaartumik ikiorsiissutit tunniunneqartassapput naatsorsuisimaneq imm. 2-mi sapaatip akunneranut siullermut atuuttoq malillugu.
Imm. 4. Naalakkersuisut S.I.K.-llu isumaqatigiissutaannik allannguuteqartoqartillugu imm. 1 malillugu aningaasat nalunaaquttap akunneranut tunniunneqartartussat annertussusaat sapinngisamik piaartumik Naalakkersuisunit pisortatigoortumik nalunaarutigineqartassaaq.
Allaffissornikkut aqutsineq
§ 9. Annertussusileriikkanik ikiorsiissutit kommunimit sulinermik inuussutissarsiuteqartup aalajangersimasumik najugaqarfianit inuillu aqqisa allattorsimaffianni nalunaarsorsimaffigisaanit tunniunneqartassapput.
Paasissutissiisussaatitaaneq, utertitsilluni akiliuteqartarneq il.il.
§ 10. Peqqussummi maleruaqqusat naapertorlugit ikiorsiissutinik pisartagaqartup pisussaaffi-gaa atugarisamigut allannguutit ikiorsiissutit ikilisinneqarnissaannik unitsinneqarnissaannilluunniit kinguneqarsinnaasut kommunimut nalunaarutigissallugit.
§ 11. Inuk ikiorsiissutinik pisartagalik ikiorsiissutinik pisartagaqarnerup nalaanut taassumalu siunertaanut matussutaasunik kingusinnerusukkut taarsiivigineqarpat assigisaanilluunniit pippat, kommunalbestyrelsi utertitsilluni akiliisoqarnissaanik aalajangiissaaq.
§ 12. Inuk § 10 - 11-imi piumasaqaataasutut paasissutissiisimanngippat imaluunniit pisinnaa-titaannginnini ilisimareeraluarlugu peqqussut malillugu ikiorsiissutisisimappat utertillugit akiliisoqarnissaanik kommunalbestyrelsi aalajangiissaaq.
Aningaasalersuineq
§ 13. Inatsisartut peqqussutaat manna naapertorlugu aningaasartuutit kommuninit akilerneqassapput.
Naammagittaalliuuteqarsinnaaneq
§ 14. § 4, imm. 3 - 4, § 6, aamma §§ 11 - 12 naapertorlugit kommunalbestyrelsip aalajangiineri isumaginnittoqarfiup aqunneqarnera aaqqissussaaneralu pillugit Inatsisartut peqqussutaanni aalajangersakkat malillugit Isumaginninnermi Naammagittaalliuuteqartarfimmut naammagittaalliuutigineqarsinnaapput.
Imm. 2. Peqqussummi matumani aalajangersakkat allat naapertorlugit kommunalbestyrelsip aalajangigai aqutsinikkut oqartussaasunut allanut naammagittaalliuutigineqarsinnaanngillat.
Atortuulersitsineq ikaarsaariarnermilu aalajangersakkat
§ 15. Inatsisartut peqqussutaat manna 1. januar 2002-imi atortuulerpoq.
Imm. 2. Peqatigitillugu pisortat annertussusileriikkanik ikiorsiisarnerat pillugu Inatsisartut peq-qussutaat nr. 11, 1. november 1982-imeersoq atorunnaarsinneqarpoq.
Imm. 3. Inuit ulloq 31. december 2001 tikillugu annertussusileriikkanik ikiorserneqartartut na-lunaaquttap akunneri pisartagaqarfissatik pissavaat peqqussut siornatigut atuuttoq naapertorlugu. Ikiorsiissutit tunniunneqartussat annertussusaannik naatsorsuinermi nalunaaquttap akunneri taakku aalajangiisuussapput, § 8, imm. 3 naapertorlugu nutaamik naatsorsuusiornissamut piumasaqaataasut naammassineqarserlugit.
Namminersornerullutik Oqartussat, ulloq 12. november 2001.
Jonathan Motzfeldt/
Ole Dorph